查頓辛祖拒道歉　曼聯宣布禁止跟一隊操練

曼聯領隊坦哈格同查頓辛祖和談破裂！曼聯周四(14日)發聲明，宣布對查頓辛祖進行紀律程序，即時禁止佢跟曼聯一隊操練。據《The Athletic》消息，查頓辛祖因拒絕就批評坦哈格一事道歉，令曼聯不得不「痛下殺手」。

曼聯上場聯賽輸畀阿仙奴後，坦哈格表示未將查頓辛祖列入大軍名單，係因為佢「操練有問題」，查頓辛祖隨即發聲明反駁，直指坦哈格「講大話」同搵佢做「代罪羔羊」。雖然曼聯高層希望雙方和解，查頓辛祖日前亦將聲明刪除，並且入選曼聯25人英超名單，但原來雙方仍然僵持唔肯認衰。

據《The Athletic》報道，曼聯曾要求查頓辛祖向坦哈格道歉，不過呢位23歲球星作出拒絕，直接令曼聯採取今次行動。曼聯宣布喺對查頓辛祖嘅紀律程序完成前，佢只會進行個人練習。傳聞曼聯將喺1月轉會窗將查頓辛祖賣走，沙特球會伊蒂法克同德甲勁旅多蒙特，都傳出對佢有興趣。